ಬಸವನ ಹುಳು ಮತ್ತು ಕವಡೆ

ಒಂಟಿ, ಒಬ್ಬೊಂಟಿ.

ಸುತ್ತೆಲ್ಲಾ; ಎದೆ ನಡುಗಿಸುವ ಸದ್ದು-

ಭರ್ರನೆ ಎರಗುವ ಬಸ್ಸು-ಕಾರು-ಸ್ಕೂಟರು,

ಸರ್ರನೆ ಮೇಲೇರಿ ಬರುವ ಚಕ್ರ ಪ್ರವಾಹ,

ಹೆಜ್ಜೆಯೂರಲೂ ಆಗದ ನಡುಗುವ ನೆಲ…

ನಡುವೆ ತೆವಳುವ ಒಂಟಿ ಜೀವ…

ಭಸ್ಮಮಾಡುವ ಪ್ರಖರ ಬೆಳಕು

ನಕ್ಷತ್ರಪುಂಜವೇ ಕಳಚಿದಂತೆ,

ಮೇಲೆ ಉರಿವ ಬೀದಿಗಳು,

ಬೆಳಕಿನ ಸುಳಿಯಲಿ ಮಂದ ನಡಿಗೆ,

ಕಣ್ಣ ಆಸರೆಯೂ ಕುರುಡು

ದಾರಿ ಸಾಗಲೇಬೇಕು, ಒಂಟಿ ಬೇರೆ…..

ಭೂಮಿ ಬಿರಿವ ಭೀತಿ,

ಬೆಚ್ಚಿ ಬೀಳಿಸುವ ಕೂಗು,

ಗುಡುಗು-ಸಿಡಿಲಿನ ಬೆದರಿಕೆ,

ಹನಿಯೊಡೆದರೆ ಹೊಳೆ ಬರುವ ಹೆದರಿಕೆ

ಇಂಚಿಂಚಾಗಿ ಸರಿಯುತಿದೆ

ಸದ್ದಿಲ್ಲದೆ ನುಗ್ಗುತಿದೆ ಏಕಾಂಗಿ…

ಕಿಕ್ಕಿರಿದ ಹೈಟೆಕ್ ರಸ್ತೆಯ

ನಡುವೆ ಶರವೇಗದ ಉರುಳು

ನಡುವೆ ಮಂದಗತಿ;

ಮೆಟ್ರೋ ಫ್ಲೈ-ಓವರ್ ಮೇಲೆ ಸಹ್ಯಾದ್ರಿ!

ಮೃದು ಚೆಲುವಿನ ಧ್ಯಾನ್ಯಸ್ಥ ನಡೆ…

ನಿಜದಂಗಳದಲ್ಲಿ ಬದುಕು

ಸಾವಿನ ಜೂಜಿಗಿಟ್ಟ ಕವಡೆ!

ಮಳೆಯೋ ಮಳೆ ಎದೆಯೊಳಗೆ….

ಅವಳ ಕಣ್ಣಿನ ತುಂಬ

ಮಿಂಚು ಮಿನುಗುವ ಬೆಳಕು…

ಹನಿಒಡೆದ ಬಳಿಕದ ಹೊಂಬಿಸಿಲ

ಎಸಳು ಕಿರುನಗೆಯ ಮಂದಲೆ.

ಅವನ ಕುಡಿನೋಟದ

ಸಿಡಿಲ ತಾಕಿದ ಕ್ಷಣ

ಪ್ರೀತಿಯ ಮಳೆ…. ಧೋ…

ಮಳೆ-ಮನಸ್ಸುಗಳ

ಪುಲಕ- ಮೈಯೊಳಗೆ!!

ಜೀವ ಪ್ರೀತಿಯ

ಘಳಿಗೆಗೆ ಹನಿಯ ಬೆಳಗು!!